peperonity.net
Welcome, guest. You are not logged in.
Log in or join for free!
 
Forgot login details?

For free!
Get started!

Text page


zanniatsumthang.peperonity.net

CICAI KHUA THAWHKEH DAAN

CICAI KHUA THAWHKEH DAAN CiCai khua hi Sim Dihai khua ihsin rak toh mi asi. Hi
khua a rak tohtu pawl hi
Tlaisun ral ṭih ih Khawlei
khua ihsin a rak tlan mipawl
an si. An rak tlannak thuhla
cu hi ti vekin asi. Kumzabi 19 nak thoktir lam hrawngah
khan Khawlei khua le Tlaisun
khua hi khawpi zet veve an
rak si. Cule hi lai san hi lei
doral rak timi san asiih khaw
khat le khaw khat an rak doawk lai san asi. Cuti asi
ruangah hih Khawlei le
Tlaisun khal hi an rak do aw
ciamco; Cule Tlaisun pawlin
an rak neh ruangah an rak
hmuhsuam ciamco. Cutin lo hnaṭuan ih an feh sungih, an
suncaw (Nau-rawl) tanta
mipawl tiangin Tlaisun
pawlin an ei sak thluh
ringring.
Cucu Khawlei khau pawl cun an hua in an
thinheng tuk konan mai neh
lomi ti cu zianghman ti ngam
loin caan ziangmawzat sung
cu an um. Asinan cân a rung
rei deuh vivo hnu cun an thinheng le ning tuk cun hiti
vekin thuruah khawmnak an
nei; A thurel mi cu “Tlaisun
pawlin in hmuhsuam tuk
lawmam ruangah hitin kan ti
pei, Kan khawtlang in Liliam Zu kan ṭuan peiih kan zu
ṭuan mi a thawh in Tlaisun
pawl hnenah Nan khaw
pacang ṭhaṭha in ra tlawng
uh, Vok kan lo thah ding; tin
kan cah pei. Cule an ra thlen tikah vok kan thah dingih kan
Liliam Zu kan pe ding.
(Liliam timi hi thing
phunkhat asiih Zu lakih rawi
tikah a mi rit a na zet mi
asi.) Zu an rit ngah in pakhat khal hrelh lo in kan vawthat
thluh ding” ti’n khawtlang
lungkim in an rak rel. Cule a
vuaknak ding Talhbelh
tiangin an rak ralring thluh.
Cutin an rel vek cun Liliam Zu cu an hun ṭuan ih,
An zu ṭuan mi a thawhin
Tlaisun pawl cu vok thah ding
cun an hei cah. Cu ti cun
Tlaisun pawl khal cu ziang
thei loin lungawi zetin an pacang ṭhaṭha 80 cu Khawlei
khua ah cun an va feh. An va
thlenin vok cu anrak thah
ngaingai ih an Liliam Zu cu an
rak inter. Cutin Tlaisun
pacang pawl Zu an rit ngahin Khawlei pawl cun ri ngah
thlanghai maw ti’n an
Talhbelh thawn pakhat hman
hrelh loin an vuak that thluh.
Tlaisun pacangṭha 80
pawl cu tlun ti an nei nawn loih, cucun an khawpi pawl in
Khawlei pawlin an thah thluh
asi ti kha an thei. Cucun an
thin a heng tukih Con Bik ih
hoha nakin an khawri lo hnen
pawl an sawm khawm ciamco ih minung tam
ngaingai in Khawlei khua cu
an va siim. Cu ti’n an do aw
ciamco ih an tam tuk ruangah
Khawlei pawl cun neh thei
loin, a tlan theithei an tlan ṭek thluh. Hi ṭumah Tlaisun
pawlin Khawlei mi hi
ziangzat an that ti cu theih
fiangnak a um lo nan tamzet
an thah zum asi. Cutin a tlan
mi pawl cu khaw dangdang le hmun dangdang ah an rat
thleng thluh. Hi caan
hrawnghi 1850 kum hrawng
asi. Ziangah tile Con Bik hi
1820 le 1830 lakih suak mi
asi. Hiti vekih a tlan
mipawl lakin Zani pa Pu Lam
Lian (CiCai khuato hnuih
Simzawl tiih kawh mi) cu Sim
Dihai khua ah a rak thlengih
fapa Ai Than timi a nei. Cun Laizo pa Thah Det hi
Khumhmun khua ah a rak
thlengih fapa Khaw Vel
Thang timi a nei. Cun;
Sumthang pa Thang Fawn hi
Singai khua ah a rak thlengih fapa Sawn Mâng timi a nei.
(Anih hi Singai khua a
thlennak cu, Singai khua hi
Sum Thang pa Ro Za Thang ih
khawto mi asi ruangah a pu
le rak pan asi.) Cun, Zangnget pa a um veih fapa
Thang Cin timi a nei. Anih hi
Sim Dihai khua ih rak lut ve
mi asi. Hiti vekih an hong um
tikah arak um cia mi khua
pawlin nannih runral Locom bokvak Thangkawng sa ei
pawl ti’n an hmuhsuam in an
rak nautat zet. (Hi ṭongkam
hi himi ca ngantu khalin a
theih ban ve mi rori ais.)
Sim Dihai khuaih a rak thlengtu Lam Lian ih fapa Ai
Than hi mifim le micak,
ralṭha zet mi a rak si.
Curuangah Dihai khua le
Khuangli khua pawlin an rak
ṭihih amah te khua nei dingin an rak tawlrel. Hihi
CiCai khua an um hnu ih
Simzawl ti hmin an kennak
asi tin mi hrek in an sim. Cucu
hi tin asi. Khawlei khua ih a
tlan mi hrekkhat pawl kha ral a daih hnuah an kir salih hi
pawlin kir nawn loih khua an
to ta men mi kha Simhrin
pawl in an zawl asi tiah
“Simzawl” an run ti. Cule Ai
Than cu Khuangli le Dihai pawl cun, “Kan toih le kan
vah cânih kan zal bânnak
dingah khua na to ding, cule
nangmai khua asi ding” tiah
an ti. Culen Ai Than khalin
hmuhsuam le nautat rero mi an si lai lakih khua na nei
ding ti cu a rak lungkim zet
ve.
Cutin Ai Than cu
khuato ding cun Arcang le
Zawhte kengin a tuih Bocung ram lam a rak pan. Asinan
Bocung ramah hin a ken mi
Arcang a khuang duh loih a
Zawhte ken mi khal a ai duh
lo, curuangah “Hi hmun cu
khawtonak ṭha asi lo asi hi” tiin Khawpual ram lamah a
rak ṭhawn sal. Asinan
khawpual ram khalah a
Arcang le Zawhte cu an
khuang/ai duh cuanglo. Cutin
“Hi hmun khal hi khawtonak ṭha asi lo asi hi” tiin tui CICAI
khaw hmunah khin a rak
ṭhawn. Hitawk hmun a thlen
in a Arcang a khuangih a
Zawhte khal a ai. Cutin “Hi
hmun cu khaw hmun ṭha asi hi” tiin Deuthlam suang tâin
Dihai ahcun u le nau pawl
sawm dingin a tlungkir sal.
Cuisin Khawlei khua in
a tlan mi an ci le kuang pawl
hmun dangih rak thlengmi pawl kha “Mahte khua kan
nei thlang ding asi in ra pan
uh law” tiin a sawm hai.
Cutin Singai thlengtu Pu
Thawng Fawn ih fapa Sawn
Mâng, Khumhmun ih thlengtu Thah Det ih fapa Khaw Vel
Thang le Dihai in Zanget ih
fapa Thang Cin pawl thawn
CiCai khua cu 1870 le 1875
hrawngah hih minung pali
pawlin an rak toh asi. Cutin sungkhat u le nau ci le kuang
pawl kha rak pan cio dingin
an rak sawm aw. An sawm
vek cun mi ziang maw zat
cun an rak pan. Cui sin an
khaw hmin ah hi tin an sak. “Hitawkah hmun tinih kan
tlan darhnak ihsin kan ci le
kan kuang kan fin khawm aw
sal asi. “Kan ci le kan kuang
kan caih khawmawknak asi
ruangah CICAI kanti pei” tiin lungrual zetin an khaw hmin
cu CICAI tiah an rak sak asi.
Cu ruangah CiCai cu sungle
khat rual um khawm tiah an
duhdawt awin an Ṭan a rak
rual zet. Cutin Pathian
thawsuah khal an coih an
ram asia zet nan ei khop nei
loih pursum rero an rak um
dah lo. Mifarah nua ta pawl
khal milian le neinung pawl in ei le in an hmuhnak ding
ruahsak in bomṭul le pek
ṭulmi pe in, an rak
tuamhlawm aw. Thilzem
awk ding um khalah milian
pawl in, “Hi pawl cu farah nauta hrangah siseh” ti khin
an rak kian ṭheu.
Zawnruahawknank thuk zet
an rak nei. Hi khua a rak vai
mi pohpoh cu lungawi zetin
an rak hmuakih an ṭulsamnak kipah bom thei
tawkin an rak bawm.
Culawng si loin mikhual tlung
ra mi khal ṭha zetin rak
zohtu khua an si. Cuti vekih
ṭangrual le remaw zetmi khua an si ruangah mi khual
tlungra pawl khalin nuam an
tiih an rak ngam zet ṭheu.
Hi tivekih khaw nuam
zet le mi ṭhaṭha suahnak
khua asi ruagah miin “CiCai khua mi cu nupi pasal ih neih
ci, Cai ding ci an si” an rak ti.
Hi ṭongkam ih sin mi hrek
khatin CiCai khua cu Caici an
rak ti mi ṭongkam ihsin a
linglet zawngih salin CiCai tiih kawh mi asi tiah an rak
ti. Thil si ding awm zet cu
abang ve ko. Asinan CiCai
khua timi hi cuvek menih
CiCai tiih hminsak mi asi lo.
Khua a rak tohtu pawlin kan tlan ṭekih kan vahvaih le
hmuhsuam nautat kan tuar
rero nak hmunih ta kanmah
kan ci le kuang vialte hmun
khatih kan caih khawmawk
salnak asi tiih lunghmui teih CiCai khua an rak timi
asi.Curuangah CiCai timi hmin
cu um zia thukpi le san thupi
zet umih raksak mi CICAI khua asi.
Thu laknak pawl;
1. Lian Sim,
2. Tlang Lian,
3. Tlang Lawm,
4. Dar Ro Thang 5. Khuang Bual Thluai
6. Ral Sai Lo (Simhrin
Thuanthu Cabu) By Ngun Luai (Kharte Pa)

Source: www.cicai.webs.com


This page:




Help/FAQ | Terms | Imprint
Home People Pictures Videos Sites Blogs Chat
Top
.