peperonity.net
Welcome, guest. You are not logged in.
Log in or join for free!
 
Stay logged in
Forgot login details?

Login
Stay logged in

For free!
Get started!

Text page


am - Newest pictures
anbiyah.peperonity.net

☼╮☼╮3╭☼╭☼

Hazrat e Yaqub aly salam ne apne lakht e jigar ki meethi meethi baten sun kar farmaya (نعم) neaam .

Ye bat aun ke bhaiyon ne suni ke Hazrat e Yusuf ke jawab mein walid sahab ne Neaam kaha hai aur auzan de diya hai .

Ye sun kar bare bhai yahuda ne kaha ke ab tum log walid e buzurgvar ke pas jao aur aun se ijazat talab karo . Aur tum log humare sath is chiz ka ehad o peman kar lo ke apne chhote bhai ko kisi tarah ki koi gazand nahi pohnche gi .

Is ke baad sub mutafiq ho kar apne walid e buzurgwar ke pas gye aur apne walid sahab se kaha ke

(Al.Quraan) Boly ay Baap kya hai ke ehtibar nahi karte ho humara Yusuf par aur hum tho is ke khair khua hain . Bhej dijiye in ko humare sath kal ko . Kiu ke hum log wahan kuch khayen ge aur wahan ja kar khelen ge aur ye tho ap ko khub malum hai ke hum log Yusuf ki har tarah nigehbani karne wale hain .

Hazrat e Yaqub aly salam ne apne beton se farmaya ke ay mere beton tum jao ge ore Hazrat Yusuf aly salam ko bhi sath le jao ge aur main ghar mein akela reh jaun ga .

(Al.Quraan) jub Yaqub aly salam ne kaha mujh ko gham hota hai is se ke tum le jao ge is ko aur main darta hun ke kahin aysa na ho ke is ko bheriya kha jaye aur tum sub ke sub is se be khabar raho .

Yani ke aun ko bhi bheriye ka e bahana karna tha so wo hi Hazrat e Yaqub aly salam ke dil mein aus ka khof aaya.

Aur Hazrat e Yaqub aly salam ne bheriye ka tazkira is waja se aun ke samne kiya ke woh apne khuab mein dekh chuke the ke bheriye ne
Hazrat Yusuf aly salam par hamla kiya hai aur woh hamesha is khuwab se dara karte the kiu ke Anbiyah aly salam ke khuab sache hote hain jhute nahi hote,

Behar haal ye guftgu Hazrat e Yaqub aly salam ki sun kar Hazrat e Yusuf ke bhai bole .

(Al.Quraan) woh sub bole agr kha gya is ko bheriya aur hum tho sub puri jamaat hain aysa na ho ga aur hum sub sahib e Quwat hain. Agar phir bhi kha gya tho hum ne sub kuch ganwa diya.

Yani agr bheriya is ko khaye ga tho kya hum logon se itna bhi nahi ho ga ke hum 10 bhai hain aus ko apne bhai ko khane se rok saken . Agar hum ne aysa na kiya tho hum sub sakht gunah gaar hon ge .

Pas Hazrat e Yaqub aly salam ne in baton ka fareb kha kar Hazrat Yusuf aly salam ko aik roz ki ijazat de di . Aur rukhsat ke waqt Hazrat Yusuf aly salam se farmaya ay meri jaan mere deede se apna deed mila kar jao aur mere pas aao tho main tumhe apne gaod mein le lu kya pata phir tumhe dekhu ya na dekhu

Baad is ke apne deegar beton se kaha ke Yusuf ko tumhe sonpa ab jao phir esi pau se salamat aao mere pas.

Ye keh kar Hazrat e Yaqub aly salam ne aun ko rukhsat kiya aur woh sub ke sub aun se ijazat le kar chal diye.

(Al.Quraan) phir jub le kar chale aur aapas mein mutafiq hue ke dalen is ko gum naam kuven mein ..

Pas jate jate kanaan (کنعان)
Se 6 kos ke fasle par apni bakriyo ke charah gaah mein ja pohnche.

Hazrat Yusuf aly salam khel kud ke sath khushiyan karte hue chale.

Bhaiyon ne aun par zulam dast darazi aur tamanche marna shuru kar diye .

Hazrat Yusuf aly salam ne apne bhaiyon se faryad o zaari ki aur kehne lage maine aysa kon sa gunah kiya hai jo tum mujh par itna kar rahe ho .

Kya mere baap ne mujhe tum ko nahi sonpa hai ya tum mere bhai nahi ho . Tum log apne baap ki vasiyaten aur nehmaten mat bhulo . Aur meri be maadari aur pisari par Rahem karo.

Har chund ke Yusuf ne kaha lekin aunho ne kuch bhi na suna aur barabar marte e rahe.

Phir woh sub kehne lage ke tu ne ye bat jhut bana kar apne baap se kahi hai ke maine khuab mein dekha hai ke aaftab o mehtaab aur 11 sitaron ne mujhe aa kar sajda kiya hai .

Shayed teri yehi aarzu hai ke hum sub tere zer e hukam rahen . Aur ab tho teri maut aa chuki hai . Aur is jaga par koi bhi aysa nahi hai ke teri pusht panahi kar sake aur tujh ko hum logon se chhura sake.

Tub Hazrat Yusuf aly salam ne apne bhaiyo se ye baten suni tho woh apne bare bhai Yahuda ke pas chale gye . Aun se ye majra kiya .

Aunho ne ye sun kar apne bhaiyo ko sakhti se mana kiya aur kaha ke tum log apne ehad par Qayem raho aur inhe mat maro.

Is par woh sub kehne lage ke is ko kisi gum naam kuven mein dalna chaiye.

Phir is ke baad Hazrat e Yusuf ko sub bhai mil kar aik gum naam kuven ke kinare par le gye aur in ke tamam kapre utar liye aur nanga kar ke hath paun bandh kar aik doll mein bitha kar kuven mein daal diya .

Hazrat Yusuf aly salam bohut faryad o zari karne lage aur kaha ke aaj koi aysa nahi hai ke woh mere zaheif bap ko khabar pohncha de . Aur woh aa kar dekhen ke in zalimon aik gum naam kuven mein mujhe be gunah gira diya hai . Aur zara bhi in ko taras na aaya

Hazrat e Yusuf jub is andhere kuven mein jub aadhi raah mein ja pohanche .

Aur rassi aus waqt doll ki bare bhai yahuda ke hath mein thi .

Tho dusre bare bhai shaamun ne aa kar rassi kat di . Aus ka dili irada ye tha ke jaldi se kuven mein ja gire aur phir wahin mar jaye.

Qaza e ilahi se aik neza pani kuven mein khali tha

Khuda ke Hukam se Hazrat e Jibrail aly salam ne aa kar aunhe kuven ke andar pani ke aupar aik pathar par bitha diya.

Hazrat Yusuf kuven mein kahi din rahe Baaz ne kaha hai ke sirf aik din raat rahe

Jub bhaiyon ne aa kar inhe kuven mein dala tha tho aunhe yaqin ho gya tha ke ke Yusuf kuven ke andar mar gye aur hum logon ne nijat payi

Aapas mein kehne lage ke ab behtar yeh hai ke hum sub tauba karen aur humari tauba Khuda Qabul kare aur is chiz ka azam e samem karen ke shub o roz apne baap ki khidmat kiya karen taake woh hum sub se khush aur razi rahen

Audher Hazrat Yusuf aly salam kuven ke andar rote rote az had nidhal ho gye

(Al.Quraan) aur Hum ne wahei ki aus ko ke jitaye ga in ko aun ka ye kam aur woh na janen ge


This page:




Help/FAQ | Terms | Imprint
Home People Pictures Videos Sites Blogs Chat
Top
.