peperonity.net
Welcome, guest. You are not logged in.
Log in or join for free!
 
Stay logged in
Forgot login details?

Login
Stay logged in

For free!
Get started!

Multimedia gallery


hindi.gay.novel3.peperonity.net

Meri Chaand-Raat Ki Subah 14

agale din ham donon ne apani naukariyaan chhod deen.

mujhe to usake saath rahanaa thaa. mainne sochaa ki main usi shahar
mein koi naukari dhoondh loongaa.

jis shahar ko main hameshaa ke liye alwidaa bol chukaa thaa, main
wahin basane waapas pahunchaa.

ham ek hotel mein thahare. pahale to teen-chaar property brokers ko
apani requirements bataaee aur kuchh options dikhaane ko kahaa.

hamane ek car rent kari, aur main tabbu ko apanaa hostel aur apanaa BE
waalaa college dikhaane le gayaa.

shaam ko tabbu ne kahaa, "bhayya ke makaan maalik ne itanaa sab kiyaa
thaa, abhi bhi phone par baat hoti rahati hai. chal unase mil aate
hain."

meri phat gayi.

ham donon mere chaand ke ghar gaye.

uncle-aunty tabbu se bade pyaar se mile. tabbu ne mujhe introduce
karaayaa, "ye meraa room partner hai, uncle."

wo donon mujhase bhi bahut pyaar se mile.

aunty ne mujhase kahaa, "is par bahut museebatein guzarin hain. isakaa
hameshaa khayaal rakhanaa."

mainne haan mein sar hilaayaa.

ham khade hi the.

uncle ne poochhaa, "kab aaye? kahaan thahare ho?"

tabbu ne kahaa, "aaj subah aaye hain. hotel mein thahare hain."

aunty chaunkeen, "are, tujhe to seedhe yahin aanaa chaahiye thaa."

uncle ne kahaa, "jaa. jaa kar saamaan laa. jab tak hai, yahin rahanaa."

aunty ne kahaa, "haan, betaa."

aunty ne car ki chaabhi nikaal kar di, "car bhi chhod aanaa. yah
bekaar khadi rahati hai. kuchh to chale."

main rented car le gayaa. tabbu uncle ki car le gayaa.
---

ham donon uncle ki car mein saamaan le kar waapas aaye. uncle-aunty ne
apane bete kaa room theek kar diyaa thaa. hamane saamaan usamein
rakhaa.

aunty coffee naashtaa banaa kar laaeen.

uncle ne poochhaa, "idhar kyaa kaam nikalaa?"

tabbu ne bataayaa, "uncle. bhayyaa kaa kuchh paisaa aayaa hai. ham
bhayya ke naam par ek anaathaalay kholanaa chaahate hain. sochaa ki
bhayyaa ke shahar mein kholanaa hi theek rahegaa."

uncle-aunty khush ho gaye.

unlce bole, "great, yaar. aaj kal ke ladake aisaa kahaan sochate hain?
sab paise kamaane mein lage rahate hain."

aunty ne kahaa, "ab dekh. hamaare paas hi ye badaa saa bangalaa hai.
itanaa paisaa hai ki agali saat peedhiyaan aaraam se baith kar khaa
sakein, par iklautaa betaa jaa kar amaricaa bas gayaa hai, aur agali
saat peedhiyon ko baith kar khilaane kaa paisaa jamaa kar rahaa hai.
hamein usaki fiqr lagi rahati hai. use hamaari fiqr lagi rahati hai."

uncle kuchh sochane lage.

tabbu ne kahaa, "mainne kahaa to thaa ki aap donon ko bhi wahin shift
ho jaanaa chaahiye."

aunty ne kahaa, "ye to jaane ko tayyaar hain par meraa man nahin
maanataa. 50 saal ho gaye hain jab shaadi ke baad mein is ghar mein
aaee thi. aur phir us ajanabi mahaul mein kaise adjust honge?"

uncle bole, "tabbu. main ek suggestion detaa hoon, gaur karanaa. ham
log bete ke paas US shift kar jaate hain. kyon na tum yahi banglow
khareed lo aur is par hi anaathaalay banaao. pitaaji ne itani mazboot
neenv daali hai ki chaar manzil to aaraam se banaayaa jaa sakataa hai.
aur phir Narendra ne aakhiri saans yahin lee thi. isase zyaadaa waajib
jagah aur koi nahin ho sakati."

tabbu ne kahaa, "uncle ye to aapakaa ehasaan hai ki aap ye jagah de
rahe hain. jo qeemat boliye main dene ko tayyar hoon."

uncle bole, "market price 50 laakh hai. too jo chahe, de de. ham ise
kamaane ke liye nahin bech rahe hain. bas ek waadaa kar ki is bangale
ko tudawaayegaa nahin. pitaaji ne ise banaayaa thaa. main to yahin
paidaa huaa hoon. kabhi-kabhi aa kar dekh jaayaa karenge. kam se kam
ham donon ke marane tak ise aisaa hi rakhanaa. hamaare baad jo
chaahein kar. bete ko isase koi moh nahin hai."

tabbu ne kahaa, "main waadaa karataa hoon, uncle. 50 laakh kal de
doongaa. ham oopar construction shuru karawaate hain. neeche kaa
hissaa aapakaa hi rahegaa. jab tak chaahiye rahiye. jab aanaa ho
aaiye."

aunty ko bilkul mazaa nahin aayaa thaa, bolin, "mujhe to amarica
bilkul nahin bhaataa. main to nahin jaanaa chaahati."

tabbu ne kahaa, "phir kyon jaa rahi hain. aap donon yahin rahiye."

mainne kahaa, "haan, uncle. aap ek bete ki paas jaanaa chaahate hain.
yahaan anaathaalay mein aapako saikadon bete-betiyaan milane waale
hain."

tabbu ne kahaa, "aapane ek bete ko paal pos is qaabil banaayaa ki wo
amaricaa jaa kar laakhon kamaa rahaa hai. ab in anaath bachchon ko is
qaabil banaaiye ki wo izzat se kuchh kamaa-khaa sakein."

mainne kahaa, "ham donon abhi chhote hain. ham abhi duniyaadaari nahin
samajhate hain. hamein is kaam ko anjaam dene ke liye aapake
maargdarshan ki zaroorat padegi."

tabbu ne kahaa, "aur aap khud bhi jaanate hain ki hamein aap jaisaa
imaandaar insaan nahin mil sakegaa. aapane bhayya ke ek-ek saamaan ko
itani mehanat se police se bachaayaa, aur phir sambhaal kar rakhaa aur
mujhe diyaa."

uncle-aunty ki aankhon mein khoob saari CFL jalane lage the.

aunty ne kahaa, "theek hi to kah rahe hain. kyaa karanaa hai apani jad
se ukhad kar us ajanabi duniyaa mein jaa kar. wahaan par buddhon ki
bilkul izzat nahin karate hain. yahi rah jaao naa."

uncle ne haan mein sar hilaayaa, bole, "phir to main tujhase is
bangalow ke paise bhi nahin loongaa. is kaam ke liye ek trust banaa
dete hain. hamaare paas 2 karod rupaye hain. un paison ko aur is
bangale ko too is kaam mein hamaari taraf se daan samajh le."

ham donon bhauchakke unhein dekh rahe the. par un donon ke chehare par
ek roohaani sukuun thaa.

tabbu ne kahaa, "theek hai uncle. main bhi bhayyaa kaa saaraa paisaa
isi trust mein daal detaa hoon. aap trustee baniye."

uncle bole, "good decision. phir tax bhi bach jaayegaa. main legal
aspects dekh letaa hoon. Narendra kaa kitanaa paisaa aayaa hai?"

tabbu ne kahaa, "uncle, aap sound-proof room, un cameron aur
microphone ke baare mein jo kah rahe the, shaayad wahi sahi thaa.
bhayyaa shaayad pornography mein the. isiliye ham un paise ko nahin
rakhanaa chaahate hain aur kisi achchhe kaam mein lagaanaa chaahate
hain. teen karod rupayaa aayaa hai aur mujhe lagataa hai ki abhi aur
bhi aataa rahegaa. aapako buraa to nahin lagegaa aise paise se bani
organisation se jud kar."

Hmm. to room sound-proof bhi thaa. wall-papers camere aur microphones
ke saath sound-proof design bhi chhupaane ke liye lagaaye gaye the.

uncle soch kar bole, "nahin betaa. paise kaa rang nahin hotaa. aur
phir itanaa badhiyaa istemaal to kisi bhi paise ko izzat de degaa.
shaayad Narendra kaa qatl bhi us kaam yaa us paise ki khaatir hi huaa
hogaa."
---

uncle ne mujhase poochhaa, "tum kyaa karate ho?"

mainne bataayaa. yah bhi bataayaa ki mainne yahin se BE kiyaa hai. yah
bhi bataayaa ki yahaan koi naukari dhoondhoongaa.

uncle ne kahaa, "mere bahut contacts hain. kaho to kal hi tumhaari
naukari lagaa doon. par main sochataa hoon ki doosare ki naukari
karane ki jagah tumhein apanaa hi koi business karanaa chaahiye.
internet, phone ke zamaane mein office aane-jaane kaa time kyon waste
karoge? yahin rah kar apane home office se hi operate karo. America ki
kaee companies apane kaam india mein subcontract kar rahi hain. bahut
kaam hai. tum jitanaa kar sako utanaa mil jaayegaa. meraa betaa wahaan
se coordinate kar degaa."

sab khush ho gaye.

aunty uthin, "bataao kyaa khaaoge."

mainne aunty se kahaa, "aunty aaj to rahane dijiye. aaj main tabbu ko
apane college ke dinon ki yaadein taazaa karaane le jaa rahaa hoon.
khaanaa wahin khaayenge. kal se yahin khaayenge."
---

dinner par main tabbu ko binaa kuchh bataaye usi restaurant mein le
gayaa jahaan main pahali baar apane chaand se milaa thaa.

mainne tabbu ko baahar khadaa kiyaa, aur restaurant ke andar jaa kar
manager se baat kari.

mainne kahaa, "hamein us waali table par hi dinner lenaa hai."

mainne sau kaa ek note nikaal kar manager ko diyaa.

manager ne jaa kar us table par baithe logon ko kuchh bol kar doosari
table par shift kar diyaa. table saaf kar di gayi.

main tabbu ko bheetar laayaa. ham usi table par baithe. wo mere chaand
ki jagah baithaa thaa. main usake saamane baithaa thaa.

waiter aayaa. mainne wahi sab order kiyaa jo us raat mere chaand ke
liye aayaa thaa.

waiter ne kahaa, "baaki log kab tak aayenge?"

mainne hans kar kahaa, "too to le aa. wo aate rahenge."

tabbu aaraam se muskuraa rahaa thaa.

tray par tray bhar kar khaanaa aayaa. waiter rakhane lagaa to mainne
use rok diyaa.

mainne har dish se thodaa-thodaa nikaal kar tabbu ki aur meri plate
mein rakhaa, aur waiter se kahaa, "ise gareebon mein baant denaa."

usane muskuraate huye salaam kiyaa, bolaa, "sir, ham logon se zyaadaa
gareeb kaun hogaa? ham aap sabako ye sab tar maal serve karate hain,
par hamaare liye alag se bekaar saa khaanaa banataa hai. kahein to ham
hi khaa lein?"

mainne haan bolaa.

wo salaam bolataa huaa chalaa gayaa. usane manager se jaa kar kuchh
bolaa. manager ne aashcharya se meri taraf dekhaa. mainne haan mein
sar hilaayaa. manager ne waiter ko jaane diyaa.

tabbu muskuraataa jaa rahaa thaa. use lag gayaa thaa ki use koi badi
baat pataa chalane waali hai.

mainne aur tabbu ne khaanaa khaayaa.

ham bill de kar baahar nikal kar car mein baithe.

tabbu ne bol, "yaar, main suspense se maraa jaa rahaa hoon. ab bataa bhi de."

mainne kahaa, "main isi restaurant mein, isi table par, aise hi dinner
par us ladake se milaa thaa jisake saath mainne ek raat sex kiyaa
thaa."

wo khoob hansaa, khoob hansaa, khoob hansaa.

main bhi hansaa. par meraa dil ro rahaa thaa.

aas paas se guzarate log ham donon ko car mein baithe hansate dekh kar
hansane lage.

mainne car badhaaee. us jagah le jaa kar roki. mainne tabbu se bolaa,
"mainne use yahaan se pick kiyaa thaa."

wo hansaa. wo car se utar kar wahaan jaa kar khadaa ho gayaa.

main car chalaa kar laayaa, aur usake paas rok di. khidaki se sar
nikaal kar bolaa, ...
Next part ►


This page:




Help/FAQ | Terms | Imprint
Home People Pictures Videos Sites Blogs Chat
Top
.