peperonity.net
Welcome, guest. You are not logged in.
Log in or join for free!
 
Stay logged in
Forgot login details?

Login
Stay logged in

For free!
Get started!

Multimedia gallery


hindi.gay.novel3.peperonity.net

Meri Chaand-Raat Ki Subah 15

ham dilli waapas aaye.

tabbu ne bhayya kaa saaraa qeemati saamaan bhi bench diyaa.

tabbu ne mujhase kahaa, "bike bench de."

mainne kuchh nahin poochhaa aur bench di.

ham apane computers, kapade aur tabbu ki bike le kar waapas aaye. mere
paas chaand ki 12 hard disks bhi thin.

ham uncle ke ghar pahunche. fresh huye.

tabbu mujhe le kar garage mein gayaa.

wahaan mere chaand ki bike rakhi thi. wahi number.

tabbu ne bike ki key nikaal kar mujhe di, bolaa, "bhayya ki bike hai.
mere paas thi isaliye ise yahin rakhi rahane di thi. ab ye teri hai."

mainne use start kari. tabbu peechhe baithaa. ham ek long drive par gaye.

hamane lift lene waale scene ki phir se shooting kari.
---

anaathaalay kaa kaam zor-shor se chal rahaa thaa.
---

mere chaand ke birthday ke chhah maheene guzar gaye. is baar tabbu ne
ek hafte pahale hi mujhe bataa diyaa thaa ki usakaa birthday aane
waalaa hai.

mujhe apane chaand ki aakhiri cheez tabbu ke hawaale karane kaa mauqaa
mil gayaa thaa.

wo leather jacket.

mainne unake photoes mein dekhaa thaa ki wo jacket kabhi meraa chaand
pahane thaa, kabhi tabbu.

mainne tabbu ko kuchh nahin bataayaa. mainne nepaali market se ek
doosari jacket kharidi. usakaa baakaayadaa bill banawaayaa.

mainne nayi jacket bag se nikaal kar apane briefcase mein chhupaa di,
aur mere chaand ki wo leather jacket us nayi jacket ke bag mein rakh
kar bill ke saath pack kar di. ek dukaan se use badhiyaa gift wrap
karaa liyaa. mainne use bhi apane ek briefcase mein chhupaa diyaa.

aur us shaam ko uncle-aunty aur mere saamane tabbu ne cake kaataa.
phir ham logon ne outing kari aur hotel mein khaanaa khaayaa.

raat ko ham apane room pahunche.

mainne tabbu se kahaa, "tuu yah to nahin soch rahaa hai ki main
kanjoos ho gayaa hoon aur tujhe gift nahin de rahaa hoon."

wo hansaa, bolaa, "nahin. main soch rahaa hoon ki tuu mujhe koi bahut
khaas gift dene waalaa hai."

mainne briefcase se nikaal kar packet use diyaa.

usane wrapper phaadaa, bag kholaa.

jacket dekhate hi usakaa cheharaa phak ho gayaa. usane gaur se bill
dekhaa. usakaa shaq door ho gayaa.

wo khayaalon mein gum ho gayaa.

usane jacket bed par hi rakh di aur jaa kar computer table par baith gayaa.

mainne usake paas aa kar usake baal sahalaaye. usane meraa haath apane
haath mein le liyaa, aur table se pen uthaa kar mere haath par ek ke
bheetar ke gole banaane lagaa.

main usake man ki haalat samajh rahaa thaa. mainne kahaa, "teri
photoes mein tujhe aur bhayya ko aksar ek jacket pahane dekhaa thaa.
pichhale hafte mujhe nepali market mein lagbhag waisi hi jacket dikhi
to mainne khareed lee thi. hai naa tere is special day ke liye special
gift. thodi farq hogi par phir bhi jab too ise pahanegaa to tujhe
lagegaa ki bhayya tujhase lipataa hue hain."

wo yaadon mein khoyaa huaa thaa, aur mere haath par gole aur dil
banaataa jaa rahaa thaa.

phir usane kahaa, "Ankit, ek naatak kar rahaa hoon. agar galat nikale
to buraa mat maananaa, please."

main usaki kisi bhi baat kaa buraa nahin maanane jaa rahaa thaa.

wo uthaa. usane mujhe le jaa kar bed par bithaa diyaa. phir wo jacket
uthaa kar laayaa aur use bed par phailaa diyaa.

jacket ki zip band thi. usane wo zip kholi.

usane meraa hatheli jacket ke baaye taraf oopar kar ke rakh di.

aur phir usane jaket kaa daayaa hissaa kholaa.

aur mainne dekhaa ki usane meri hatheli par jo khoob saare gole aur
dil banaaye the, ekdam waise hi, utane hi gole aur dil us jacket ke
bheetar bane huye the.

mujhe kaato to khoon nahin.

wo computer table ke paas jaa kar meri taraf peeth kar ke khadaa ho gayaa

wo bolaa, "abbu-ammi kaa intakaal ho chukaa thaa. meraa birthday
aayaa. ham donon ke paas ek toffee khareedane ke paise bhi nahin the.
ham donon shaam ko ghar ke darawaaze par ek doosare se lipate baithe
the."

"tabhi ek pheri waalaa cycle par guzaraa. cycle par ek aakhiri jacket
tangi huyi thi. bhayya ne use rokaa. daam poochhe. pheri waale ne 800
rupaye bole. bhayya bheetar gaye. aur school se mile apane saare
medals, cups laa kar pheri waale ko diye. pataa nahin wo sab 800 ke
the yaa nahin, yaa ham donon ke udaas, ummeed bhare chehare, yaa
saamaan khatam kar ke ghar jaane ki jaldi. pheri waalaa jacket hamein
bech kar chalaa gayaa."

bhayya ne wo jacket mujhe pahanaaee. kadaran badi thi. bhayya udaas ho
gaye. mainne kahaa, "theek to hai, bhayya. jab ham donon bade ho
jaayenge tab bhi ise pahan sakenge." bhayyaa khush ho gaye.

chhah maheene guzar gaye. haalaat aur kharaab ho gaye the. bhayyaa kaa
birthday aayaa. us din subah-subah mainne bhayyaa ko wish kiyaa, aur
kahaa, "sooraj bhayya, main apane paas ki sabase badhiyaa cheez aapako
gift kar rahaa hoon." aur mainne wahi jacket bhayya ko pahanaa di."

bhayya kuchh udaas ho gaye. tab mainne ek sueen (needle) uthaai, aur
jacket ke bheetar bhayyaa ke dil ki taraf ek golaa banaa diyaa, mainne
kahaa, "sooraj bhayya, ye golaa chaand hai, matalb ki main hoon. aap
ise jab bhi pahanenge tab main aapake dil se lagaa rahoongaa. bhayya
khush ho gaye.

phir meraa birthday aayaa. bhayya ne yahi jacket mujhe gift kari.
unhonne pahale gole ke oopar ek dil banaa diyaa thaa, aur usake oopar
ek aur golaa banaa diyaa thaa. bole the, "sooraj ke dil mein chaand
hai."

"aur tab se ham donon ek-doosare ke birthday par hameshaa yahi jacket
gift karate rahe the. naye gole banaate rahe. naye dil banaate rahe.
ham donon ke birthday chhaH maheene baad aayaa karate the. aadhe saal
ise bhayyaa pahanate the. aadhe saal main pahanataa thaa."

wo bolaa, "bhayyaa apane jeete ji yah jacket kisi ko nahin de sakate
the, Ankit. bhayyaa kaa ek-ek saamaan uncle ne sambhaal kar rakhaa
thaa aur mujhe de diyaa thaa. yah jacket bhayyaa kaa qaatil hi apane
saath le jaa sakataa thaa, Ankit."

wo bolaa, "ho sakataa hai ki qaatil ne in ise bech diyaa ho, aur tujhe
yah us dukaan par mil gayi ho. par meraa dil kah rahaa hai ki itanaa
badaa sanyog nahin ho sakataa hai."

wo bolaa, "lekin is beech aur bhi kai saare sanyog hue hain jin par
mainne aaj se pahale gaur nahin kiyaa thaa. mujhe dekh kar teri
hairaani. kamaraa dekh kar teri hairaani. teraa gay na hone par bhi
mere saath rahanaa. meraa khayaal rakhanaa. mujhase bhayya ke baare
mein poochhanaa. mere liye gay ban jaanaa. bhayya ke paise aanaa.
itane saalon baad. itane saare rupaye. achchhaa khaasaa career chhod
kar teraa mere saath yahaan shift kar jaanaa. agar ye sab sanyog hain
to phir to Allah aaj-kal full-time mujhe hi khush rakhane mein lagaa
huaa hai. phir baaki qaayanaat kaise chal rahi hai?"

wo bolaa, "agar too abhi bhi kahegaa ki toone yah jacket pichhale
hafte khareedi hai, to main maan loongaa aur tujhe kabhi pareshaan
nahin karoongaa. "

wo bolaa, "main tujhase pyaar karataa hoon, Ankit. mujhe tujh par
bharosaa hai. main jaanataa hoon ki tuu dil kaa achchhaa hai, aur
kabhi kuchh galat nahin kar sakataa. par agar tujhase kinhin haalaat
mein kuchh galat ho gayaa thaa, to main samajh paaoongaa. main tere
saath pahale ki tarah rahoongaa aur is baat kaa koi ziqr nahin
karoongaa."

wo bolaa, "mujhe bhayya ke baare mein sab kuchh bataa, Ankit."

wo mudaa. usaki aankhon se aansoo bah rahe the. meri aankhon mein weeraani thi.

main kuchh der mein bhaari aawaaz mein bolaa, "tujhe yaad hai, chaand!
ek restaurant, ek table, ek dinner, ek raat."

usane yaad karate huye kahaa, "jahaan tujhe teraa pahalaa partner milaa thaa?"

mainne haan mein sar hilaayaa.

wo mere aage bataane ki ummeed kar rahaa thaa.

main kuchh nahin bolaa.

wo confuse hokar bolaa, "to?"

mainne bhare gale se kahaa, "soch."

usaki aankhein sikudin, aur phir phat padin.

usane yaqeen na karane waale aashcharya se kahaa, "bhayya?"

aur main apanaa cheharaa apane haathon mein chhupaa kar rone lagaa.

main rotaa rahaa.

main soch rahaa thaa ki wo mujhe aa kar chup karaayegaa, dilaasaa degaa.

par wo nahin aayaa.

aur yah jaankar meraa dukh aur badh gayaa ki use mujhase nafarat ho
gayi hai. main aur zyaadaa rone lagaa.
----------
Continued



This page:




Help/FAQ | Terms | Imprint
Home People Pictures Videos Sites Blogs Chat
Top
.